-ছালাম অ’দা। -ওয়ালাইকুম, বয় অ’নাতি, তুরে আজিয়ে এক্কানা ফরফইজ্জে মিক্কে লাআর; ঘটনা কি ক’চাই। -কন’অ ঘটনা-টটনা নাই অ’দা, তুইও ভালা আছতো হিতার লাইবুলি  আরেও  তুয়ারতে ভালা লাগের পানলাআর। -আইচ্ছে যক্দে ঠিকঠাক মত ভোড দিইয়ছ না ? -দিত্ পাইজ্জি অ’দা, হিয়েনতো’ন দেশকান শান্তিতে থাইলে অইল। -অ’নাতি ঠিক হথায়ান কৈয়ছ, কন্ দল জিত্তে, কন্ দল ন’জিতে হিয়েন বরঅ হথা ন, বাংলাদেশ জিতিলে অইল্।  অ’দা ঠিক কৈয়ু। বাংলাদেশ খামকা জিতন্ পারিবু। -হ ! যেত্তর জয়, হেততর বোঝা বয়। ক্ষমতাত্ বয়অন মানি বাঘর পিঢত্ চরি বয়অন। ইয়েন  আর হথা না গুনী অওলর হথা, বুইঝ্ ছনা নাতি। -হ! দাদা। -হুন্ দেশর বওত্ উন্নতি অইয়ে হাসিনের আমলত্ , শেখর মাইয়ে হাসিনা বার বার এক্কান হথাই কঅর, আঁই দেশ আর মানুষর উন্নয়ন ছারা কিছু ন’চাই। পাবলিগত্তে ধইয্য ধরি সরগাররে সহযোগীতা গরন দরহার। তইলে দেশর বাদবাকী উন্নয়ন তারাতারি সম্ভব্ অইবো। -হ! দাদা হিয়েন মাইনেষত্তে  খাঁটি গরি বুঝন পরিবো। -অ’নাতি কি কৈয়ুম,  আবার দেশর মানুষ দলকানা, ‘দল’ বুঝে বেশী, ‘দেশ’ ন’বুঝে। আগে দেশ চাই/ পরে দল। দলকানা নো অই বিয়াকে মিলি দেশরে ভালবাসিলে বঙ্গবন্ধুর ‘সোনার বাংলা’ ইয়েন ঠিগই সোনার বাংলা অইতো। -অ’দাদা হাসিনের বাপে দেশ ইয়েন স্বাধীন গইজ্জে, কিয়াও-কিয়াও আছেদে তানে চউগ খাইতে দেইত্ ন’ পারে, ইয়েনর মানি কি ? -হাসিনের বাপে চাইয়েদে আঁরারে বা -আলত্তুন মানুষ বানাইতো, হেইরৈম্মে কিছু মানুষ এহনও আইজো বাঁআল রই গেইয়ে, মানুষ অইত্ ন’পারে। হিতারাই হাসিনেরে চউগ্ খাইতে দেইত্ ন’পারে। -অ’দা  আরা একন আরেক জনের লগে হিংসে-হিংসি গরি বারি ওইঠটে। যেই হারনে এই দশা। -ঠিগ্ কৈয়ুছ অ’নাতি। হিংসে-হিংসির ফেকটরী’ত এই দেশত্ বেশী। মানুষ অহিংস পরম ধর্ম, কেন্এ অইবো। এই হিংসে-হিংসিত্ তুন কিয়াও বাঁচি নাই। বিয়াক দলর ভিতর হিংসে-হিংসি আছে। হুদে দল কিয়া বিয়াক মাইনষেত্তে এই হিংসে-হিংসির আলামত আছে। হিয়েনত্তুন বাঁচিত ন’পাইরলে মানুষ হওন মুষকিল আছে। যারা বেশভুষেয় সাফিয়ানা মিক্কে হিতারাই হিংসে-হিংসির চাষ গরের। -অ’দা তুঁয়ার শরীল কেন্ খারাপ লাআর পান লাআর। -কেনে বুঝিলি? -তুঁইতো কাঁইপতে লাইগতো। -ডরে কাঁপিরদি’নে শীতে কাঁপিরদে অ’নাতি। আজিয়া যাইগুই, তই হুন- সোনার দেশ পাইতি চাইলে সোনার মানুষ চাই, হিয়সে পিন্দেয়ি চারিয়েনে যুদি সুখকান পাই। গ্রন্থনা : খ.মা.আ