কন্ডের পানি কন্ডে গরার বুঝিত্ ন’পারির -ছালাম অ’দা -ওয়ালাইকুম…….। -তই এক্কানা ভালা আছনি অ’দা? -আছি কন’অ রৈম্মে, বুরে বষত্ আর ভালা থাইলেও কদ্দুর; কন’অ কন’অ রৈম্মে দিন পার গরন এরি। -অ’দা তুঁয়ারার মতন কিছু পুরানা মানুষ আইজো বাঁচি আছ বুলি দুইয়েন এক্কান হথা হুনিত্ পারি, তুঁয়ারা ন’ থাইলে আরা কন্ডে যাইয়ুম, কার কাছে যায়িুম। -হুদে বুরে অইলে অইতুনু, হুঁশ-আক্কলত কিছু থাকন পরিবু। অ’নাতি র্তুতে মগর হুঁশ-আক্কল এক্কানা কম। -অ’দা হুঁশ-আক্কল এক্কানা পাইবেরলাই বুলি তুঁয়ার কাছে আইয়া-যা গরি। আল্লায় দিলে কিছুতো তুঁয়ারতুন শিখ্কি। -তইলে হুন্ ঁআই ছোড থাইক্তে দেখ্কি আঁরার বারীর সামনেও ওগ্গে পইর আছে; মুরও আছে বেশী। পইর হিবের নাম অইল্দে ‘নয়া পইর’। একদিন নয়া পইর হিবের পানিত্ অইন্ লাগি পানি বিয়াক জলিয়েনে ছাই অই গেলগুই। -তই অ’দা কিয়াও পানি মারি অইন এগিন নিপেইত্ ন’পাইরলোদেনা! তই ….. -তই আরকি! তুরতে দে হুঁশ-আক্কল আইজো কম, হিয়েন্ আঁই ঠঅর পাইলেম। -কিয়া অ’দা ? -আইজোঁ ‘কিয়া অ’দা’ কদ্দেনা ! যে যিয়েন কয়বো হিয়েন ন’বুঝি মানি লঅন অইলদে বোকামী। হুঁশ-আক্কল তুরতে কঁত্তে অইবো নাতি ? -আইচ্ছে যক্দে অ’দা সামনর মিক্কে ভোড অইবো বুলি হুনির, তই কেএন্ বুইঝদে লাইগ্গোন ? -ভোডর দিন ভোড দিবি, এত বুঝোবুঝির কি আছে। -ঁআরার দ্যাশত্ ভোড লইয়েনে ভুড্ভুডানি বেশী, যারারে দিয়েনে দেশর ভালা অইবো তারাতে ভোড দিলে দেশর লাভ, মাইন্ষর লাভ হিয়েন বুঝন্নান কঠিন ন…। -অ’নাতি এহন্ এনা ঠিক হতায়ান কৈয়ছ। দেশ আর মানুষ ঠিক থাইলেই অইবো। ইয়নর নাম অইলদে গনতন্তর’অ। মারামারি-পিডে-পিডি আর দলাদলি গইরলেই গনতন্তর’অ ন। কনঅ-কন্অ মাইন্ষেরে পঅলা ছালিমে পাইয়ে, কেন্এ ক্ষমতাত্ যায়বো, কেন্এ ক্ষমতাত্ থাকিবু, ইয়েনরলাই বুলি দরহার অইলে দেশ ওলডেই ফেলিবু। তারাত্তে এক্কানা শরমঅ ন’লাগে। দেশর মাইন্ষর ক্ষতি গরি কিয়র দেশ দরদী, ইতারা আতদে দেশ দরদী ন, নিজর দরদী, এই রৈম্মে নিজর দরদী অক্কলরতুন দেশ্অরে, বাঁচান দরহার। -অ’দা কন্রৈম্মে মানুষ ভোড পাইবের যইগ্য মানুষ বুলি মনে অঅর। -পয়লে নমবর শিক্ষিত, গিয়ানী, সৎ, মাইনষেরে ভোড দিলে দেশর কাজত্ অইবো। যেইল্লে-হেইল্লে মাইন্ষের ভোড দিলে জানছ্তো কি অইবো। দেশ ইয়েন ঁআরারো কিয়া দান ন গরে। তিরিশ লাখ মানুষ পাকিস্তানী অওলর হাতত্ খুন অইয়েনে ঁআরারে দি গেইয়েদে। এই দেশর যারা হেই সমত্ পাকিস্তানী অলরে সহযোগীতে গইজ্যে হিতারা খাপ্ দি বই রইয়ে, হুনিরদি হিতারার কিয়া-কিয়া নাকি ভোডত্ থিয়েইয়ে। তই বুঝন পরিবো, কনডের পানি হন্ডে গরার। কন্ডের পানি কন্ডে গরার বুঝিত্ ন’পারির, কিয়াও তারারে মানি লইলেও আঁইতো ন’মানির। গ্রন্থনা : খ.মা.আ
সর্বশেষ সংবাদ
- ভাষা আন্দোলনের নেতা অলি আহাদ ও প্রখ্যাত সাংবাদিক গিয়াস কামাল চৌধুরী দেশ ও জাতির কল্যাণে আজীবন ত্যাগ স্বীকার করে গেছেন
- পৌরসভার লাইসেন্স পরিদর্শক এক চেয়ারে ১৫ বছর
- সোনারগাঁয়ে পুলিশের বিশেষ অভিযানে বিভিন্ন মামলা নারী ও শিশু বলাৎকার সহ আটক ২২, ইয়াবা উদ্ধার
- ছয় পুলিশ কর্মকর্তা বদলি
- অশান্ত পাহাড়, পাহাড়ি – বাঙ্গালি সহাবস্থান কোন পথে?
- ওসি ইখতিয়ার উদ্দিনের নেতৃত্বে অভিযান, পাঁচলাইশ মমিনবাগ থেকে উদ্ধার মোটরসাইকেল, জব্দ প্রাইভেটকার ও গ্রেপ্তার ২
- গো আপ ফাউন্ডেশন ও ফুটস্টেপসের নেতৃত্বে বসিলা ৪০ ফিট খাল পুনরুদ্ধার; ১২ ঘণ্টার মধ্যে মেরামত হলো সড়কবাতি
- ঠাণ্ডা মিয়ার গরম কথা (৩৬৭) সংসদ সদস্য হাসনাত আবদুল্লাহ সমীপে
- শিক্ষকরা সরকারের বেতনভুক্ত, তাই তাদের অন্য পেশা বা সাংবাদিকতা করার সুযোগ নেই-প্রেস কাউন্সিল চেয়ারম্যান
- মাদকবিরোধী সামাজিক আন্দোলন করে প্রাণনাশের ঝুঁকিতে ব্যবসায়ী আনোয়ার হোসেন